Gipusil, gidakdakan og bato

CEBU, Philippines - Usa ka drayber sa traysikad ang giingong gitabangan og patay sa amahan ug anak pinaagi sa pagpusil kaniya ug pagdakdak og bato sa ulo niini diha sa sitio Mahayahay, sa barangay Gabi lungsod sa Cordova sa milabay’ng hapon.

Ang biktima mao si Robert Quimada, 29, residente sa maong dapit samtang ang gitumbok nga responsable sa maong krimen mao sila si Marlon Abalde, 24, ug ang amahan niini nga si Mariano Abalde, 60, mga silingan usab sa biktima.

Matud pa ni Rowena Merdido ang kapuyo ni Quimada ngadto sa kapolisan nga mga alas 3:00 sa milabay’ng hapon dunay gipangita si Quimada nga personal niyang butang nga nahanaw ug gituohan niining gikawat hinungdan nga kini gisapot ug migawas sa balay.

Apan pipila ka gutlo ang nakalabay nakadungog siya og masipang buto hinungdan nga kini migawas sa ilang panimalay ug mao nalay iyang nakit-an nga naggunit si Marlon (suspek) og pusil samtang ang amahan niini midakdak og bato ngadto ni Quimada.

Base sa imbestigasyon, gikatahong gidudahan ni Quimada si Marlon maoy mikawat sa nawagtang niining personal nga butang.

Apan giingong gipusil ang biktiima ug diha maigo sa ibabaw nga bahin sa tangkugo si Quimada, apan bisan paman sa grabeng samad niini nakabunot pa kini sa iyang kutsilyo ug gihansakan ang bukobuko ni Marlon.

Si Mariano pagkakita nga nadunggaban ang iyang anak kalit nga midasmag nga nagbitbit og bato ug gidakdakan si Quimada kinsa niadtong tungura nagkamang na sa yuta.

Si Marlon gidala sa usa ka Jonas Regner ngadto sa tambalanan samtang miikyas ang amahan niini. Apan sila si PO2 Calixto Butantan nga miresponde sa hitabo misikop kang Marlon diha sa tambalanan.

Si Quimada nga samaran sa iyang tangkugo ug sa nawong gidala usab sa tambalanan apan gideklarar sa mga mananambal nga patay nang miabot kanila.

Matud pa ni SPO1 Luvero Agusto sa Cordova Police padayon pa ang ilang imbestigasyon apan usa sa motibo nga ilang gisusi mao nga may karaang panagbangi ang biktima ug mga suspek. (BANATNEWS)