Barko himuong Korte ibutang sa N. Cebu

CEBU, Philippines - Usa ka barko ang ipahimutang dapit sa isla sa Malapascua sa lungsod sa Daanbantayan aron mosanta sa ilegal nga mga panagat sa maong lugar.

Ang maong barko magsilbi usab nga Korte diin adto husayon ang mga kaso may kalabutan sa mga ilegal nga panagat.

Matud pa ni Atty. Antonio Oposa sa Visayan Sea Squadron nga ang Korte tawgon og Seaborne Environmental Justice nga sama sa Justice on Wheels nga gimugna sa Korte Suprema.

Usa ka composite team nga langkuban sa National Bureau of Investigation, Bureau of Fisheries and Aquatic Resources, Cebu Coast Guard, Naval Forces Central, Maritime Police, Department of Justice, Visayan Sea Squadron ug mga abogado ang modumala sa barko.

Nagpaabot nalang ang grupo sa kamandoan ni Gob. Gwendolyn Garcia aron makasugod na sila sa ilang operasyon.

Matud pa ni Oposa nga ilang gipili ang dapit duol sa isla sa Malapascua nga usa ka tourist destination sanglit pabor kini sa pagpaniid sa mga ilegal nga panagat sa kadagatan sa isla sa Bantayan ug sa isla sa Carnaza sa Daanbantayan.

Gikataho nga grabe na kaayo ang ilegal nga panagat sa maong dapit nga kabahin sa Visayan Sea.

“The best form of law enforcement is when the law does not need to be enforced,” matud pa ni Oposa.

Kabahin sa silot sa mga madakpan mao ang pagpatabang sa pagbantay sa kadagatan ug pagmugna og mga marine sanctuary.

“The strategy therefore, is, finish violation, move on to positive (restorative) activities, di lang sige panakop,” dugang pa ni Oposa. (BANATNEWS)