Biyahe ni Loot ipasusi

CEBU, Philippines - Ipasusi sa gobernadora sa lalawigan sa Sugbu ang nadawat niining walay pirmang sulat nga nagpahibawong mibakasyon sa nasud sa China si Daanbantayan Maria Luisa Loot nga walay permiso sa iyang buhatan.

Sumala pa ni Capitol Consultant on Information Atty. Rory Jon Sepulveda nga ang maong sulat gikan sa wala magpaila nga tawo nga nahibawo sa mga lakaw ni Loot. 

Sigon sa maong suwat nga si Loot kauban sa iyang pamilya mibakasyon sulod sa usa ka semana apan wala kini makapangayo og pagtugot gikan sa buhatan sa gobernadora.

 Matud pa ni Sepulveda nga kun tinuod ang maong taho, nalapas ni Loot ang Section 96 sa Local Government Code nga ang mga mayor sa kalungsuran gikinahanglan nga mangayo og permiso sa gobernadora kun mogawas kini sa probinsiya ug labaw sa tanan sa gawas sa nasud.     

Apan giklaro ni Sepulveda nga ila pa kining susihon ang nadawat niining kasayuran kun itugot kini sa gobernadora.

Si Gov. Gwen Garcia nisumbong nga uyon siya sa pagpasusi sa pag-adto ni Loot sa nasud sa China ug andam usab kining mohimo og legal nga lakang batok sa nahisgutang mayor. 

Gipahibawo sa gobernadora nga niadtong niaging semana ang anak ni Mayor Loot nga si Provincial Board member Sun Shimura personal nga nangayo og leave of jurisdiction ingon man permiso pagbiya una sa iyang katungdanan kay moadto kini sa China.     

Apan ang inahan niini nga mayor wala gyud nangayo kaniya og permiso sa iyang buhatan. (BANAT NEWS)