Jun Alcover sa ANAD nanumpa na

CEBU, Philippines - Pormal nang gipapanumpa sa hawanan sa Kongreso ang Sugboanong partylist representative sa ANAD partylist nga si Cong. Pastor “Jun” Alcover alas 9:45 sa gabii niadtong Huwebes human gi-proklamar sa Commission on Election nga apil kini sa mga midaug nga partylist sa milabay’ng Mayo 10 nga eleksyon.

Gibutyag ni Alcover atol sa interbyu sa Bantay Radyo nga si House Speaker Feliciano Belmonte maoy mipapanumpa kaniya sa plenary nga gitambungan sa iyang pamilya.

Pagka alas 11:55 sa buntag niadtong Huwebes unang gi-proklamar ang ANAD Partylist human usab gibasura sa Korte Suprema ang tulo ka mga reklamo batok sa maong partylist.

Ang unang reklamo nga gibasura sa Comelec en banc ug Korte Suprema mao ang petisyon sa Bayan Muna nga nagtinguha pagpa-disqualify sa maong partylist nga ilang gihulagway nga dili sectoral representative.

Ang laing duha ka reklamo mao ang petisyon nila ni kanhi Cebu Customs Collector David Boy Odilao nga nangangkon nga maoy tinuoray nga nominee sa ANAD ingon man ang susamang reklamo ni Gregorio Mercado ug usa ka Tabal nga pulos gipangbasura sa Korte Suprema. (BANAT NEWS)