Pusher og shabu tiklo

CEBU, Philippines - Nasakmit sa kapolisan ang ubay-ubay nga pakete sa shabu gikan sa usa ka gikatahapang pusher atol sa buy bust operation didto sa sitio Utlanan, barangay Umapad, dakbayan sa Mandaue.

Si SPO2 Reynaldo Urot sa Presinto 5 sa Opao Police Station miila sa nadakpan nga mao si Joselito Ytang, 42 , minyo nga taga Umapad.

Samtang ang giingong tig-supply og shabu nga nailhang si Alex Omolon, hingkod nga taga Umapad ra usab, nakaipsot ug gipangita karon sa kapolisan.

Si SPO2 Urot nga nahinabi sa Banat News miingon nga si Inspector Wilson Abot nga maoy hepe sa Presinto 5 maoy nangulo sa buy bust operation sa maong dapit.

Dugang pa niya nga usa sa ilang mga kaubang polis sa Presinto 5 maoy nagpakaaron-ingnon nga customer pinaagi sa pagpalit og shabu nga P600 ang kantidad.

Dihang gitunol na ang kuwarta ngadto kang Ytang, gitunol usab sa maong suspetsado ang pito ka pakete nga gisulod sa plastik nga giingong shabu nga maoy hinungdan nga kini gisignit sa mga polis.

Girikisa sa kapolisan ang kalawasan sa suspetsado ug may dugang pang mga pakete sa shabu ang ilang nakuha.

Didto usab sa balay sa suspetsado, nadiskobrehan ang dugang pang shabu ug kahimanan sa paggamit niini nga nasakmit sa mga otoridad.

Nasakmit usab ang salapi nga balor og P529,000 nga gituohang halin sa gipamaligyang shabu. (BANAT NEWS)