Problemado sa pamilya naghikog

CEBU, Philippines - Tungod sa problema usa ka lalaki ang gidudahang naghikog sulod sa pinuy-anan niini sa Kingswood Village, Upper Lipata lungsod sa Minglanilla kagahapon sa alas 6:00 sa buntag.

Ang nagpakamatay mao si Carlito Codog, lumad nga taga siyudad sa Ormoc ug kasamtangang nagpuyo sa nahisgutang lugar tungod sa iyang pagpanarbaho dinhi.

Matud pa ni PO3 Rolland Camillo sa Minglanilla Police Station dihang nahinabi sa Banat News subay sa imbestigasyon, si Codog katapusang nakit-ang buhi nianang pagkagabii nga nakig-inom sa mga barkada.

Apan pagkabuntag nakit-an nalang kini sa iyang mga silingan nga nagbitay sulod sa lawak nga dunay higot nga electrical wire sa liog nga gihigot ang pikas tumoy sa kisame ug wala nay kinabuhi.

Dugang nahipos nga impormasyon sa kapulisan nga adunay problema sa pamilya si Codog ug kanunay lang maghinuktok. (BANAT NEWS)