Komentarista sa radyo gi-aresto

CEBU, Philippines - Gibalhog sa bilanggoan ang usa ka komentarista sa radyo nga human dakpa sa kapolisan sa Mandaue City Police Office (MCPO) sa iyang panimalay alas-9 pasado sa gabii tungod sa kasong libelo.

Ang gidakop tungod sa kasong two-counts of libel mao si Apolinario “Jun” Arigo Jr. lumad nga taga lungsod sa Tuburan ug kasamtangang nagpuyo sa barangay Lawaan, dakbayan sa Talisay. Gipasakaan og duha ka mga kasong libelo si Arrego ni kanhi mayor ug karon board member Thadeo Ouano sa dakbayan sa Mandaue gumikan sa mga giluwatan niining mga pulong sa iyang programa sa radyo nga giingong malisyoso.

Si SPO1 Arnulfo Quiatchon ug mga kaubanan sa Investigation Detection and Management Bureau (IDMB) sa Mandaue City Police Office (MCPO) maoy mi-serve kang Arrego sa warrant of arrest nga giluwatan ni Judge Marilyn Yap sa Branch 28 sa Regional Trial Court (RTC) 7.

 Gitanggong si Arigo sa detention cell sa Presinto 2 sa Subangdaku Police Station apan gipagawas lamang usab kini sa kapolisan ala-una pasado ang takna sa hapon sa adlaw nga Domingo tungod sa release order nga giluwatan ni Judge Silvestre Maamo sa RTC dakbayan sa Sugbo.

Matud pa ni SPO1 Quiatchon nga mokabat sa P10,000 ang kantidad sa piyansa sa matag kaso nga giatubang ni Arigo alang sa temporaryong kagawasan niini.

Ang komentaryong gireklamohan ni Ouano gisibya ni Arigo niadtong Septiyembre 28, 2009 sa sibyaanang dyKC nga diin nianang panahona usa na ka pribadong molupyo sa dakbayan sa Mandaue si Ouano. (BANAT NEWS)