Piyansado gipusil

CEBU, Philippines - Usa ka lalaking bag-uhay lang nakapiyansa sa kaso sa ilegal nga drugas ug paghupot og armas ang gipusil samtang nagbarog-barog daplin sa dalan pasado alas-6 sa miaging gabii diha sa sitio Estasyonan sa barangay Mabolo ning siyudad.

Ang anaa karun sa pribadong tambalanan giila sa kapulisan ang biktima nga mao si Rommel Medico “Alias” Medic, 41, nga taga Saint Joseph St. sa barangay Hipodromo ning siyudad.

Duha ka wala mailhing tawo nga nagsakay og motorsiklo ug ang usa niini ang mipusil sa biktima makadaghang higayon.

Si SPO3 Rey Cuyos sa Homicide Section ug mga sakop sa Scene of the Crime Operation daling miresponde sa nahitaboan ug nakahipos og lima ka basiyo sa kalibre 45 nga bala diha sa crime scene.

Sa gihimong imbestigasyon sa kapulisan nagbutyag nga nagbarog-barog ang biktima daplin sa dalan samtang nakig-estorya kini sa iyang higala nianang tungura dihang kalit giduol sa gunman dayon gipusil.

Pagkahuman niini yanong milakaw paingon sa kaubang nagpaabot sa usa ka motorsiklo ug miikyas palayo sa maong lugar.

Si Medico nakaangkon og samad pinusilan sa walang bahin sa iyang lawas, walang bukton ug walang paa kinsa daling gihatud sa Velez Hospital.

Gikumpirmar sa kapulisan nga si Medico nadakpan sa miaging buwan diha sa sitio Riverside sa barangay Hipodromo sa mga sakop sa Investigation and Detective Management Branch (IDMB) sa Cebu City Police Office (CCPO) nga gipangulohan ni Supt. Pablo Labra II subay sa search warrant nga giisyu sa korte tungod sa paghupot og dili lisensyadong armas.

Apan si Medico nakapiyansa sa kaso nga drugas ug armas nga iyang giatubang sa korte.

Nagtuo ang kapulisan nga posibleng gipanimaslan si Medico sa iyang kaatraso, apan padayon pa hinuon nag-imbestigar ang kapulisan niini kun nganong gipusil gyud siya niadtong higayona.

Si PO3 Wetzel Berry mibutyag sa Banat News nga ilaha karong gisubay ang impormasyong napasakaan kini og kasong frustrated homicide (at large) kaniadto. (BANAT NEWS)