CEBU, Philippines - Si Provincial board member Arleigh Sitoy sa ikaunom nga distrito nagtinguha sa pagpabalik sa swimsuit competition sa mga ipahigayong beauty contest sa mga kalungsuran sa lalawigan sa Sugbu.
Kini pinaagi sa pagpasar og resolusyon nga mag-amendar sa section 5 sa article 1 sa chapter III sa Ordinance 2005-18 nga naila na nga "Women Development Code of the Cebu Province."
Sa maong ordinansa, ang beauty contest nga nanggamit, nag-abuso, nagpakauwaw ug nagtratar sa kababayen-an nga mga "sex objects" ang estriktong gidili sa eskuylahan, komunidad, barangay atol sa mga espesyal nga selebrasyon.
Buot sa lalawigan nga ang mga contests mopakita sa katakos ug potensyal sa kababayen-an sama sa mga pasundayag may labot sa kultura.Sumala pa ni Sitoy sa iyang resolusyon nga mahimong ipadayon ang swimsuit competition kun magsul-ob lamang og one-piece bathing suit ug kinahanglan nga may pagtugot gikan sa local government units.
Gitataw usab niini nga ang gikinahanglan lamang may monitoring body nga maoy mosusi sa standards ingon man mo-monitor sa mga establisamentong mo-host sa beauty contest.
Ang maong resolusyon pagahisgutan unya sa senemanang sesyon sa mga sakop sa hunta probinsiyal karong adlaw nga Lunes.
Lakip sa wala itugot sa lalawigan mao ang pagpahigayon og mga bikini open contests sa lalawigan bisan paman sa kadaghan sa mga turistang maagni niini sa nagkadaiyang mga beach resorts ug bars gumikan kay gihulagway kining pagpaubos sa dungog sa mga kababayen-an.
Duha ka mga starlet nga sila si Maui Taylor ug Jennifer Lee ang gipasakaan og kaso sa lalawigan tungod sa ilang pag-apil sa bikini open sa usa sa mga lungsod sa amihanang bahin sa Sugbu. (BANAT NEWS)