Milayat sa Kawasan na-missing

CEBU, Philippines - Usa ka lalaking miambak gikan sa ibabaw sa Kawasan falls ang gikabalak-ang nadisgrasya human wala na molutaw og balik gikan sa iyang pag-ambak sa tubig kagahapon sa buntag diha sa barangay Matutinao sa lungsod sa Badian.

Ang biktima nailhan nga si John Rex Caramonte, 33, molupyo sa barangay Tanke syudad sa Talisay ug traysikad driver sa maong dakbayan.

Sa inisyal nga imbestigasyon sa kapolisan sa lungsod sa Badian base usab sa gibutyag sa kapuyo sa biktima nga si Rose Marie Cabando nga ang biktima miambak gikan sa kinatas-an nga bahin sa maong falls.

Kini bisan paman sa pipila ka mga pahimangno gikan sa mga tigbantay sa maong falls nga delikado kun molukso gikan sa kinatas-an nga bahin sa maong falls tungod kay posibleng madala kini sa kakusog sa sulog diha sa ilawom.

Apan giingong daw gibalewala sa biktima ang maong pahimangno ug mipadayon gihapon kini og ambak ug sa dihang natugpa na kini sa tubig wala na mitunga ug gikabalak-ang nalumos na kini.

Kagahapon, ang kapolisan sa Badian ug mga tanod ug lifeguards sa maong barangay padayon pa sa pagpangita kang Caramonte, giingong lubog kaayo ang tubig karong mga panahona gumikan sa pagsige og uwan.

Kahinumduman nga niadtong tuig 2008 buwan sa Marso aduna usab mga grupo sa estudyanteng Koreano ang nadisgrasya sa maong lugar ug usa ang namatay.

Ang namatay mao si Leon Sang Guen, 24 samtang ang mga na-angol mao sila Ryu Ho-Jun, 25, Elon Chang Sun, 22 ug Chung Seong Ah, 24.

Samtang sa pipila na ka mga tuig ang milabay daghan nang mga hitabong susama niini sa maong dapit gumikan sa kawalay paghatag og importansya sa mga pahimangno. (BANAT NEWS)