Mahuyang gitulis gipatay

CEBU, Philippines - Gitulis ug gipusil patay ang usa sa duha ka mahuyang human kini magmagahi paghatag sa ilang mga cellphone samtang naglakaw sa dalan sa sitio Libo barangay Tayud lungsod sa Lilo-an niadtong Biyernes sa alas 11:45 sa gabii.

Ang biktima nga patay nang nadangat sa tambalanan mao si Randy Hiyas, 28, usa ka mahuyang ug molupyo sa Maribago siyudad sa Lapulapu ug ang iyang kauban nga si Ritchie Entera, 27, usa usab ka mahuyang ug molupyo usab sa nahisgutang lugar.

Duha ka mga lalaking sakay og motorsiklo ang mitumbok nga maoy responsable sa krimen. Matud pa ni PO1 Adonis Terania sa Consolacion Police dihang nahinabi sa Banat News nga ang mga biktima gikan nagpahigayon og home service massage sa maong lugar.

Apan dihang namauli na sila samtang naglakaw sa dalan gisundan sila sa mga tulisan ug pag-abot sa mingaw nga dapit gituparan ang mga biktima ug ang angkas mition og armas dayong deklarar og tulis.

Ang tulisan mimando kanilang ihatag ang ilang mga salapi ug cellphone sanglit niadtong tungura nagpunay og text si Hiyas samtang naglakaw sa dalan.

Tungod kay mahalon ang cellphone ni Hiyas nagmagahi kini sa paghatag niini butang nga gikasuko sa tulisan ug diha-diha gipusil ang biktima sa dughan ug dihang natumba na gipunit niini ang cellphone sa biktima.

Samtang ang kaubang biktima nga si Ritchie pagkakita sa gibuhat sa tulisan misirit kini og dagan palayo apan tungod sa pagsinggit sa mga tulisan nga ibilin ang iyang cellphone iyaha nalang kining gilabay ug mipadayon og dagan.

Pag-abot sa mirespondeng mga polis nakaikyas na ang mga tulisan ug ang samarong si Hiyas daling gidala sa Vicente Sotto Memorial Medical Center (VSMMC) apan gideklarar nga dead on arrival.

Ang kapulisan padayun pa sa ilang man hunt operation sa nahisgutang mga tulisan sa paghimo ning balita.  (BANAT NEWS)