PNP alerto sa brownout

CEBU, Philippines - Nagmabinantayon karun ang kapulisan dinhi sa dakbayan nunot sa nahitabong rotating brownouts nga miigo dili lang sa Metro Cebu lakip na sa tibuok probinsya sa Sugbu.

Si Supt. Pablo Labra II, deputy city director for operation sa Cebu City Police Office (CCPO) nagkanayon nga sukad gipatuman ang rotating brownouts sa mga lugar dinhi sa dakbayan, mas gipahugtan nila karun ang pagbantay sa mga lugar nga maigo niini.

Kini aron mapugngan ang mga badlungon sa katilingban nga nagplanong mohimo og krimen nga pinaagi sa pagpahimulos sa kahigayonan sa pagkawagtang sa sugang dagitabnon.

Hinuon giklaro ni Labra nga sukad miigo ang halapad nga brownout dinhi sa pipila ka lugar sa dakbayan wala pay daghang natala sa buhatan sa kapulisan. Gipasabot niya nga dili kalikayan nga sakyan sa mga badlungon sa katilingban ang pagkawagtang sa sugang dagitabnon hinungdan ang mga sakop sa Mobile Patrol Group kanunay’ng maglibot-libot sa lugar ilabina sa mga dagkong establisamento.

Aron ilang mapakgang ang mga panghitabo sama sa tulis ug uban pa, niadtong miaging adlaw mihimo og saturation drive ang City Investigation and Detective Management Branch (IDMB) sa CCPO nga gipangulohan ni Chief Insp. George Ylanan ug nakadakop sila’g kapin sa napulo ka mga tawo.

Mao usab sa probinsya, ang hepe nga si Sr. Supt. Erson Digal mimando usab sa iyang mga chief of police nga magmabinantayon aron dili sila masudlan og mga akyat bahay ug mga kawatan.

Gituohan nga molungtad pa og laing mga adlaw ang nasinating brownout dinhi sa Metro Cebu area human mapawong ang duha ka unit sa Toledo Power Plant nga maoy nakaingon sa halapad nga pagkawagtang sa sugang dagitabnon. – BANAT NEWS