Kapitolyo nangapod og housing materials sa Sambag Uno

CEBU, Philippines - Nangapud-apod kagahapon si Gob. Gwendolyn Garcia og mga housing materials ug uban pa isip hinabang sa 109 ka pamilyang nabiktima sa sunog sa tulo ka sitio sa barangay Sambag 1 ning dakbayan.

Gawas sa mga bugas, noodles, canned goods, gatas ug medisina, si Garcia uban ang social officer sa Provincial Social Welfare Office nanghatag usab og mga sinakong semento ug mga kahoy aron makahinayhinay na og tukod ang mga biktima sa ilang tagsatagsa ka mga panimalay. Sa hamubong pakigpulong, kini miingon nga dili unta siya makigkita sa mga biktima aron dili saypon sa pagsabot sa kaatbang niini sa politika dinhi sa siyudad sa Sugbu nga nanghilabot siya sa siyudad.

Apan nakighimamat lamang siya sa mga biktima sa sunog human mihangyo kaniya si Sambag 1 barangay kapitan Gerry Guardo aron personal nilang mapasalamatan ang Kapitolyo.

Samtang gideklarar na sa konseho sa Sambag 1 nga ilawom sa state of calamity ang sitio Upper Kawayan ug sitio Atis. Pinaagi niini mahimo na silang makagamit og pundo sa ilang calamity fund, apan subay sa Omnibus Election Code, kinahanglang mag-agi kini sa Philippine National Red Cross ug superbisahon sa Commission on Audit.  – BANAT NEWS