Mandaue kuwa'g lawak saringan

CEBU, Philippines - Namatikdan ang pagdagsang sa kabataan nga nagtungha sa tulunghaang publiko sa dakbayan sa Mandaue ug padayon nga nasinati ang kakulang sa mga lawak saringan alang sa tuig 2010. Gumikan niini matag magtutudlo may estudyante nang tag kapin 50 ka bata ang giatiman.

Ang pagbaton sa maong gidaghanon sa mga bata nga gidumala sa matag magtutudlo maoy gihimong paagi sa kadagkoan sa Department of Education (DepEd) 7 nga kalikayan ang pagpahigayon og klase sa gawas nga maduas ang mga bata sa init adlaw.

Si Benjamin Tiongson nga maoy administrative officer sa DepEd division office sa nahisgotang dakbayan mibutyag nga misaka og kapin sa 2,315 ka mga bata nga nagtungha sa elementarya ning tuiga gikan sa 35,943 sa miaging tuig ngadto na sa 38,258 alang karong tuiga.

Dugang pa niya nga mokabat sa 27 ka mga tulunghaan sa elementarya sa dakbayan sa Mandaue nga may 643 ka mga lawak saringan ug 38, 258 ka mga bata nga nagtungha karong tuiga nga gidumala usab sa mokabat sa 771 ka mga mga magtutudlo.

Si Labogon Barangay Kapitan Damaso Tumulak dihang nahinabi sa Banat News miingon nga namatikdan niya sa ilang barangay ang pag-usbaw sa gidaghanon sa mga bata nga motungha sa elementarya sa matag tuig.

Gumikan sa padayon nga pagdaghan sa mga estudyante gihimo nga mga barangay opisyal ug sa mga sakop sa Parents Teacher Community Association (PTCA) sa pag-amot-amot og salapi nga ilang gipatukod nga payag-payag nga ilang gihimong temporaryong lawak saringan.

Dugang pa ni Tumulak nga gumikan sa maong suliran mibisita si Pinky Aquino, igsoong babaye ni Pangulong Simeon Benigno Aquino III sa maong lugar alang sa ilang pagpatukod og bag-ong edipisyo para sa nahisgotang tulunghaan.  – BANAT NEWS