CentCom midayeg ni PNoy

CEBU, Philippines - Ang Armed Forces of the Phillipines (AFP) sa Central Command midayeg sa gibuhat ni Presidente Benigno “Noynoy” Aquino sa unang 100 ka adlaw sa iyang paglingkod sa katungdanan.

Matud pa sa tigpamaba sa Public Information Office (PIO) sa CentCom Major Christopher Tampus nga dako ang ilang respeto sa tanang gihimo ni Presidente Aquino ngadto kanila.

Matud pa niya nga ila gyud nga gibati ang full support nga gihatag ni Presidente Aquino ngadto kanila ilabi na sa ilang mga operasyon sa pagmintenar sa kalinaw ug kahusay sa lalawigan.

Gani ang mga sundalo nga maoy nagkigbisog alang sa kalinaw, gipanghatagan og mga kahimanan nga importante kaayo alang sa ilang mga kalihokan.

Midugang si Tampus nga dako ang ilang kalipay tungod sa nahatag sa presidente   ngadto sa mga sundalo.

“Among na-feel nga all-out support gayud namo ang Presidente, gani dako ang among kalipay kay misaka usab ang among moral” pasabot pa ni Tampus

Samtang mibahad si Tampus sa mga militante nga ila gyud kining gukoron kun mosipyat kay mao kini ang tighaling og kasamok. “We will run after them,” pasabot pa ni Tampus.

Milaom si Tampus ug ang kinatibuk-ang Central Command nga unta ang presidente dili mohunong sa paghatag og ayuda kanila ilabi na ang ilang buluhaton sa pagpakgang sa mga grupo nga buot moguba sa dungog sa nasud. – BANAT NEWS