Nanulis sa jeepney nadakpan

CEBU, Philippines - Usa ka 19-anyos nga lalaki ang nadakpan human sa ginukdanay sa kapulisan ug naapsan sa mga sakop sa Mobile Patrol Group (MPG) dihang kini ug mga kaubanan mitulis sa mga pasahero sa jeepney kagahapon sa kaadlawon diha sa General Maxilum Avenue sa barangay Lorega-San Miguel ning dakbayan.

Ang nadakpan mao si Jay-R Lim Villacarillo, 19, taga sitio Ponce sa barangay Carreta ning dakbayan.

Si SPO1 Gregg Comaingking ug mga kaubanan sa Car 018 sa Mobile Patrol Group nga nagpatrolya pasado alas-2 sa kaadlawon nakabantay sa mga pasahero sakay sa 13C nga pasaheroan padulong sa Talamban nga naninggit nga sila gitulis.

Nasigpatan usab nila ang tulo ka mga lalaking kalit nga nanglayat gikan sa jeepney hinungdan nga ilaha kining gigukod ug ilang naabtan si Villacarillo.

Narekober sa suspek ang usa ka ‘Batangas’ nga gituuhang maoy gigamit pagtion sa mga pasahero ug ang pitaka ug cellphone nga gipanag-iya sa pasaherong si Christopher Valdez. Wala gyud motug-an ang suspek sa pangalan sa duha niya ka mga kaubang nakaikyas.

Si Villacarillo kasamtangan karung gitanggong sa detention cell sa Cebu City Police Office (CCPO), samtang sa report sa Buena Mano kagahapon giingong bag-ohay lang nakasuyop ang mga suspek. – BANAT NEWS