Citi Center i-develop

CEBU, Philippines - Gipahibalo ni Mayor Michael Rama nga moumol siya og special team alang sa pagplano nga pagpanindot sa kasamtangang Citi Center Commercial Complex nga nahimutang sa Barangay Kamagayan niining dakbayan.

Ang maong merkado publiko wala na maatiman karon, ngiob, gihimo nang pinuy-anan sa pipila ka mga informal settlers dugangan pa ang dili maayong reputasyon nga kini gihugpaan og mga dautang kalihukan.

Kini maoy hinungdan niadtong milabay’ng bulan sa Marso gimando na sa dakbayan ang pagpahawa sa mga namuyo sa sulod nga walay gitaganang kabalhinan.

Buot kining ipaguba ni kanhi mayor ug karon South District Kongresista Tomas Osmeña kay plano niining himuon kining parke, apan natapos nalang ang termino ni Osmeña wala kini mahinayon.

Nagkanayon si Rama karon nga mangayo usab siya og tabang niini sa national government aron dili maapektohan ang ubang basic services sa dakbayan.

Buot niyang mobutang og condominium alang sa mga kabos nga tawo nga maapektohan sa higayon nga masugdan na ang maong plano. Matud pa niya nga gawas nga monindot na ang palibot sa maong dapit, hingpit na usab nga mapapas ang hugaw nga imahe niini ngadto sa mga tawo diin partikular na ang giingong pagbaha sa mga dautang elemento sama sa prostitusyon ug pagkuyanap sa ilegal nga drugas ug sugalan.

“Ninduton gyud nato ang lugar, butangan nato og playground aron presentable kini nga lantawon. Maong mangayo gyud ko og tabang niini sa national government, kay dili mahimo nga magsalig ta sa kaugalingon nato nga pundo. Naa pa man gud ta’y ubang basic services nga ihatag sa katawhan,” nagkanayon ang mayor.

Usa sa plano nga duolon ni Rama alang sa maong katuyoan mao ang Bise Presidente Jejomar Binay kinsa mao usab karon ang tsirman sa Housing and Urban Development Coordinating Council (HUDCC) diha sa Pag-Ibig Fund.

Dugang pa nga kung madayon ang maong plano, makahatag usab kini og kalamboan sa turismo sanglit makunsiderar nga maayong atraksiyon alang sa mga tawo sa ubang dapit nga mobisita dinhi sa siyudad.  – BANAT NEWS