Mitulis sa maestra natiklo

CEBU, Philippines - Nagtingkagol sa Talisay City detention cell ang usa ka 24-anyos nga lalaki kinsa gipasanginlang misuway sa pagtulis sa usa ka magtutudlo sa Saint Ignacios de Loyola Academy sa sitio Laray, barangay San Roque, dakbayan sa Talisay sa miaging gabii.

Ang biktima mao si Katja Marie Cortes, 26, magtutudlo sa elementarya sa nahisgutang tunghaan.

Ang suspetsado nailhan sa mga polis nga si Joy Joel Josie Lauganas, 24, nga taga barangay Guadalupe, lungsod sa Carcar.

Si Lauganas nasikop nila ni Dominador Tañan, Reynaldo Rabago, Vicente Mañoz ug Samuel Batican, mga tanod sa nahisgutang barangay nga maoy mitugyan sa suspetsado ngadto sa kapolisan.

Base sa imbestigasyon sa kapolisan nga ang biktima diha pa sa tunghaan ug human niini mapawong ang suga sa classroom nga maoy inadlaw niyang gimbuhaton, mogawas na unta kini apan kalit lang mitungha ang suspetsado kinsa nagtabon sa iyang nawong ug t-shirt sa likod sa biktima ug gibunlot ang iyang liog dayon gibunlot usab ang iyang bag nga dala.

Apan ang biktima nakasinggit og panabang ug nakahigayon pa kini og pagdukdok sa bintana pinaagi sa iyang kumo ug natangtang niya ang gitakub nga t-shirt sa nawong sa suspetsado.

Sa panlimbasog sa biktima, napasiga pa og balik niini ang suga sa lawak hinungdan nga narespondehan dayon kini sa mga tanod nga nag-roving niadtong higayona.

Na-recover gikan sa posisyon ni Lauganas ang usa ka screw driver nga dunay gitas-ong walo ka pulgada ug kolor blue nga t-shirt nga maoy gigamit niini sa pagtaptap sa iyang dagway. – BANAT NEWS