Bar exam ipabalhin sa Sugbo

CEBU, Philippines - May dakong kalagmitan nga ikabalhin nganhi sa Sugbo ang eksamin sa mga gradwado sa abogasiya kun aprobahan sa Supreme Court (SC) ang mga yangungo sa mga kadagkoan sa lokal nga kagamhanan.

Usa niini mao ang konseho sa dakbayan sa Talisay kinsa miumol og usa ka resolusyon nga naghangyo sa SC sa pag-decentralize sa bar examination sugod sa sunod tuig.

Ang maong resolusyon gilig-on sa konseho sa maong dakbayan niadtong Martes atol sa ilang regular nga sesyon.

“There has been long-existing clamor to extend the venue of the Bar examinations in the Cebu City for the Visayas and Mindanao examinees on economic and practical considerations,” kini tipik sa gidusong resolusyon ni Konsehal Romeo Villarante sa minority block ug vice chairman sa committee on laws.

Si Villarante kinsa usa usab ka abogado nagkanayon nga niining ulahi dako og bintaha ang teknolohiya sa impormasyon ug komunikasyon alang sa Sugbo kay ikagarantiya niini ang kaluwas ug kahinlo sa eksaminasyon.

Midugang usab siya nga ang mga kawani sa Korte dinhi sa Sugbo haom ug kwalipikado sa pag-administer sa eksamin.

Ang maong sugyot ni Villarante mitumaw human sa nahitabong kasamok bag-o lang didto sa De La Salle University sa Manila diin ipahigayon ang eksamin sa bar.

Matud ni Villarante nga kung matuman ang pag-decentralize sa bar examination, ang mga Sugboanon nga mokuha sa nahisgutang pasulit daku kaayo og bintaha tungod kay makadaginot kini sa mga galastohan.

Ang Konseho sa Talisay mopadala og kopya sa nahisgutang resolusyon ngadto sa Korte Suprema, Supreme Court of the Philippines ug Integrated Bar of the Philippines-Cebu Chapter alang sa ilang tukmang aksiyon kabahin sa maong sugyot. – BANAT NEWS