Mag-uuma kit-ang patay sa Balamban

CEBU, Philippines - Patay nang nakit-an ang usa ka mag-uuma nga naglutaw sa kadagatan sa barangay Sta. Cruz lungsod sa Balamban dihang nabangalan sa mga mangingisda niadtong Miyerkules sa alas 11:00 sa buntag.

Ang napalgang patay mao si Felix Moralles Sangri, 43, molupyo sa sitio Ibo barangay Pundol sa lungsod sa Balamban.

Matud pa ni PO3 Rolando Navarro sa Balamban Police Station dihang nahinabi sa Banat News subay sa imbestigasyon ang namatay gianod na kini sa bawod sa dagat ug dihang nakit-an giguyod nalang kini padaplin sa mga mananagat.

Dali ra usab nailhan ang patay’ng lawas human giangkon sa mga kabanay. Matud pa sa kapolisan base sa pamahayag sa mga kabanay nananghid pa kining moadto sa balay sa igsuon diha sa sitio Breeding ug nakig-inom ug nagaperya uban sa iyang mga barkada ug paryente nunot usab sa kapistahan sa maong lugar.

Gikan niadto wala na mopauli ang biktima ug nahibaw-an nalang nga nakit-an na kining patay na ug gikaon na ang tabon-tabon sa mata ug ilong nga gituohang gipangkaon na sa isda.

Ang kapulisan ug mga kabanay nagpaabot pa karun sa resulta sa autopsy pagtino kun wala bay foul play ang kamatayon niini. – BANAT NEWS