Saavedra mokiha sa veco
CEBU, Philippines - Dili lamang ang gobernadora sa lalalawigan sa Sugbu ang kanunay nga pasakaan og kaso ni decorative lamppost whistleblower Crisologo Saavedra kun dili apil na usab ang Visayan Electric Company (VECO). Sa usa ka interbyu sa DyRF, si Saavedra mibutyag nga naglaraw siyang mopasaka og kasong extortion ngadto sa korte batok sa VECO tungod sa pagpasagad og pagpangayo og koleksyon bisan siya nakabayad na sa ilang bill.
Si Saavedra nagkanayon nga niadtong Septiyembre 5, 2010 sa buntag mibayad siya sa iyang matag bulan nga bill nga mokabat sa dul-an P3 mil, apan sa pagkahapon giputlan gihapon siya sa iyang kuryente.
Iyang gireklamo ang maong isyu sa usa sa mga teller sa VECO Talisay Branch diin giingong siya giingnan nga nasayop ang ilang mga tawo.
Apan aron kini mabalik og taod gikatahong gipabayad pa siya og laing P2 mil aron mabalik og konektar ang linya sa kuryente sa iyang balay bisan giangkon na nilang ilaha ang sayop.
Alang kang Saavedra usa kini ka matang sa pagpangilkil hinungdan nga iya na karong gikonsulta ang iyang abogado aron mapasaka ang nahisgutang kaso. Sa iyang bahin, ang tigpamaba sa VECO Ethel Natera miingon nga base sa ilang record naputlan ang balay patigayon ni Saavedra sa Talisay mga alas 10:00 sa buntag niadtong Septiyembre 5 apan nakabayad si Saavedra mga alas 10:49 na sa buntag busa angayan gyud og reconnection nga P2 mil nga gibase usab sa average consumption ni Saavedra.
Gipasabot usab ni Natera nga may 2 ka bulan nga wala mabayri si Saavedra ug ubos sa Magna Carta for Residents Electricity Consumers, ila kining gihatagan og 48 oras nga notisya sa pagbayad niadtong Septiyembre 21.
Ug laing 24-oras nga notisya ang gipadala sa pagka Septiyembre 30 ug gibisita pa kini sa mga tawo sa VECO niadtong wala pa ang disconnection apan wala gyud kini makabayad hinungdan nga naputlan gyud kini sa kuryente. Dugang pa ni Natera nga ang VECO andam nga moatubang sa ipasaka unyang kaso ni Saavedra ug masaligon silang dili kini molampos tungod kay alang kaniya wala silay nahimong kasaypanan. (BANATNEWS)
- Latest
- Trending
