Sikyu giluyo pagpusil 'angol'

CEBU, Philippines - Naangol ang gwardiya nga nadestino sa usa ka farm nga gipanag-iya sa Asturias Group of Companies sa barangay Poblacion sa lungsod sa Asturias dihang gipusil sa wala mailhing armado niadtong milabay’ng gabii.

Ang biktima mao si Geronimo Tuñacao, 25, nagpuyo usab sa nahisgutang dapit ug sakop sa Marangal Security Agency kinsa nagbantay sa usa ka guard post sa maong dapit.

Ang Shift Officer sa maong kompanya nga si Edwin Daigdigan mibutyag sa kapolisan nga naglingkod ang biktima diha sa guard post ug nagbasa og pamantalaan dihang kalit nga gipusil sa likod sa wala mailhing tawo.

Matud pa nga makatulo ka higayon nga gipusil ang biktima apan swerteng tapsing lang sa iyang ulo ang nahiaguman niini samtang ang mamumuno daling nakaikyas.

Si Daigdigan kinsa nagpatrolya sa maong dapit nga nakadungog sa butobuto daling miresponde apan wala na diha ang gikatahapan.

Ang biktima daling gidala sa Balamban District Hospital ug gibalhin sa Vicente Sotto Memorial Medical Center. (BANATNEWS)