Pagdaginot sa kuryente giawhag - VECO

CEBU, Philippines - Hangtud nga dili pa hingpit nga mo-operate ang duha ka power generaing units sa Cebu Energy Development Corporation (CEDC) nanawagan ang Visayan Electric Cooperative(Veco) sa pagdaginot og kuryente aron makamenus sa power shortage.

Matud pang Ethel Natera, ang tigpamaba sa Veco padayon ang pagkulang sa suplay sa kuryente hinungdan nga mipatuman sila gihapon kagahapon og tag-duha ka oras nga rotation brownouts sa ilang franchise areas.

Sa milabay’ng adlaw’ng Martes nagsugod ang rotation brownout sa kaadlawon tungod sa pag-trip-off sa Naga-Sigpit transmission lines sa National Grid Corporation of the Philippines (NGCP).

Kini maoy hinungdan sa pagkapawong sa duha ka power generators sa CEDC ug inanay nang gipabalik sa ilang normal nga operasyon. Sumala pang Natera sa gipadalang text message, nagkinahanglan og 300 megawatts (MW) ang Veco alang sa konsumidor niini, 150 MW niini ang share sa Veco.

Matud pang Natera nga upat pa ka feeders sa Veco ang wala mag-operate gumikan sa kakulang sa suplay sa kuryente nga adunay kapasidad nga 34.13 MW.

Matud pa niini, sugod sa pag-andar sa Unit 1 sa CEDC nakakuha palang sila og 20 MW. Samtang gawas sa CEDC nagkuhaan usab ang Veco og suplay sa kuryente gikan sa uban pang power producers apan sumala pa niya nga wala pa usab kini maka-suplay kanila sa wala pa matinong hinungdan.

Ang tigpamaba sa CEDC nga si Mae Melchor sa gipadalang text message dinhi sa Banat News nagkanayon nga kagahapon sa alas-10 sa buntag ang Unit-1 nakahatag na og 50MW ug padayon ang pagsaka niini sa tantong pag-andar sa Unit 1.

Matud pa niya nga kun ma-stabilized na ang Unit 1 sugdan dayon ang pagpaandar sa Unit 2.

“Cebu Energy (CEDC) is doing its best to immediately restore its two 82MW power units which were shutdown yesterday (Martes) due to line problem of NGCP’s Naga-Sigpit transmission line,” matud pa ni Melchor.

Ang mga lugar nga apektado sa duha ka oras nga rotation brownout kagahapon sa buntag mao ang pipila ka bahin sa syudad sa Mandaue ingon man ang V. Rama Avenue dinhi sa dakbayan sa Sugbo, University of Cebu Banilad ug mga silingang lugar sa Apas.

Nunot niini nanawagan si Natera sa mga konsumidor nga magdaginot pagamit sa koryinte ug tangtangon ang naka-plug nga appliances nga wala gamita ingon patyon ang suga nga wala kinahanglana aron kaminusminusan ang epekto sa rotation brownout. (Uban sa report ni Edwin Ian Melecio) (BANATNEWS)