Rehiyon 7 wa pay hot spot

CEBU, Philippines - Wala pa gihapoy nakonsiderar nga hot spots ang kapolisan sa rehiyon nunot niining umaabot nga Barangay ug Sangguniang Kabataan elections sa Oktubre 25 human sa gihimong panagtigom nga gipatawag sa Police Regional Office-7 ug Commission on Elections (Comelec) kagahapon.

Si PRO-7 Chief Supt. Ager Ontog Jr. atol sa gihimong Regional Joint Security Council Conference nga gitambungan sa tanang provincial ug city directors lakip na ang taga Comelec ug 78th Infantry Battalion wala pa makapagawas sa listahan sa mga lugar nga posibleng adunay kagubot nga mahitabo.

 Matud ni acting regional director sa Comelec-7 nga si Veronico Petalcorin nga sa pagkakarun wala pa gyud silay natumbok nga barangay nga ibutang sa hot spots sanglit gipaabot pa sab niya ang assessment sa mga provincial ug city directors nga iduso sa ilang buhatan.

Ang mabutang sa maong talaan awtomatikong dugangan og pwersa sa kapolisan ug sa militar alang sa kahapsay ug kalinaw sa dili pa ug sa adlaw na sa piniliay.

Si Sr. Supt. Erson Digal, hepe sa kapulisan sa probinsya mitug-an nga dul-an sa napulo na ka barangay sa amihanang Sugbu ang ilahang ipaubos sa election watchlist tungod sa mga nahitabong kagubot sa nanglabay’ng piniliay.

Kini mao ang barangay Cayang, Banban ug Malingon sa lungsod sa Bogo, samtang sa lungsod sa Tabuelan mao ang barangay Canluhangon ug Cantubaon.

Samtang ilaha usab paabuton kun modayon og dagan si Joel Sumabong sa pagka barangay kapitan kinsa suspek sa P9 milyones nga tulis sa Landbank Bogo pipila na ka tuig ang nakalabay.

Matud ni Digal nga wala pa nila mahibaw-i asa nga barangay kun sa Cayang, Banban ug Malingin modagan si Sumabong nga giingong usa usab ka suporter sa usa ka dakong politiko sa maong dapit.

Sa iyang bahin si Major Christopher Tampus tigpamaba sa Central Command mibutyag nga dunay 400 ka mga sundawong giandam nga i-augment sa mga lugar nga ilhon sa Comelec nga hot spot. (BANATNEWS)