Diarrhea bantayan sab - Cabrera

CEBU, Philippines - Gipahimangnoan ni Konsehal Nida Cabrera ang publiko nga manghugas kanunay sa kamot una mokaon ug siguroong limpiyo ang tubig nga imnon aron malikayan ang diarrhea.

Giawhag usab niya ang mga barangay official nga manghatag og impormasyon sa ilang mga konstituwente bahin sa mga paagi paglikay sa kalibanga. 

Base sa talaan sa Cebu City Health Department mikabat na sa 1,443 ang mga kaso sa diarrhea ug upat ang namatay, gikan sa Enero hangtud sa Agusto ning tuiga.

Matud pa sa konsehal nga sa dili pa mokaon kinahanglang manabon gyud sa kamot aron mawagtang ang kagaw nga maoy nagdala sa nagkalainlaing sakit sa tawo ilabi na ang diarrhea.

Nasayran nga gipakusgan pag-ayo sa kagamhanan ning dakbayan ang kampanya bahin sa sakit nga dengue.

Apan matud pa ni Cabrera nga mas maayong ilakip usab sa mga opisyal sa barangay ang pagpahibawo sa katawhan sa ilang tagsatagsa ka hurisdiksyon nga magbantay sa sakit nga diarrhea.

Sa laing bahin giawhag ni City assistant epidemiologist Durinda Macasucol ang mga molupyo nga kinahanglang modangop dayon sa labing duol nga health center sa ilang tagsatagsa ka lugar kun maglain ang lawas sama sa hilanat aron masuta dayon kung nataptan ba kini og dengue o wala.

Nagkanayon si Macasucol nga mas dakong bintaha nga masuta dayon ang kondisyon sa lawas sa tawo samtang sayo pa aron dili mograbe ang sakit niini.

Kahinumdoman nga tulo ka barangay sa siyudad ang gideklarar sa miaging semana sa Department of Heath -7 nga ubos na sa “dengue outbreak” nga naglangkob sa Tisa, Guadalupe ug Labangon. (BANATNEWS)