'Triggerman' miangkon sa sala

CEBU, Philippines - Mi-plead guilty ang triggerman sa pakyas nga pag-ambush sa sales manager sa Taheiyo Cement Philippines Inc. nga si Nestor Zamora sa kasong illegal possession of firearms atol sa arraignment niini sa sala ni Regional Trial Court-7 Judge Gabriel Englis kagahapon sa buntag.

Si Orlando Sagnoy miangkon sa iyang salaod nga nahimo human basahe sa iyang kaso sa paghupot sa armas nga maoy giingong iyang gigamit sa pag-ambush ni Nestor Zamora pipila ka bulan na ang nakalabay samtang nagmaneho ang biktima sa iyang Ford Everest sa may Cardinal Rosales Avenue sa barangay Camputhaw ning siyudad.

Ang abogado gikan sa Public Attorneys Office (PAO) maoy miayuda kang Sagnoy dihang kini mi-plead guilty sa maong kaso.

Si Judge Englis gikatakda usab nga moresulbar sa kaso sa labing daling panahon batok ni Sagnoy kinsa nakapiyansa unta sa iyang kaso apan wala gibuhian human giisyu ang bench warrant sa korte tungod sa pagdumili niini pagtungha sa uban pang mga hearing sa iyang kaso sa korte.

Nasayran nga si Sagnoy nag-atubang usab og kasong attempted murder uban sa drayber sa motorsiklong giangkasan niini nga si Roberto Terceros ug ang ilang gitudlong mastermind nga si Jerome Noel nga taga barangay Guadalupe ning siyudad sa Sugbu.

Si Zamora wala masamdi sa maong hitabo sanglit armored ang iyang sakyanan ug giingong nakabawos kini sa pagpusil. (BANATNEWS)