4 Koreana gilabnihan

CEBU, Philippines - Nagpundok ang mga Koreano sa buhatan sa kapolisan sa dakbayan sa Lapulapu sa milabay’ng gabii human nga upat sa babayeng Koreana ang gipanglabnihan sa ilang mga bag diha sa sitio Bagumbayan, sa barangay Maribago dakbayan sa Lapulapu.

Ang mga biktima mao sila si Jong Wa Lee, 42, Shang Lee Park, 36, Yang Lee, 50 ug Young Sheen Cho, nga kasamtangan nagpuyo sa Hilton Hotel sa barangay Punta Engano dakbayan sa Lapulapu.

Matud pa ni Lee nga samtang naglakaw sila sa maong dapit mga alas-10 sa milabay’ng gabii duha ka tawo ang nagsige og sunod ngadto kanila ug kalit lang milabni sa ilang mga bag.

Buot untang sundan ni Lee ang mga lalaki apan gipugngan siya sa iyang       mga kauban gumikan kay nahadlok.

Base sa pamahayag sa mga biktima adunay sulod nga mga pitaka ug wala matinong kantidad sa kwarta, mga cellphones ug mga importanteng dokumento ang ilang mga bag. (BANATNEWS)