Duna nay gisundang suspek

CEBU, Philippines - Aduna nay gisundang mga tawo ang kapolisan sa dakbayan sa Talisay nga posibleng may kalambigitan sa pagpamanhig niadtong Sabado sa gabii sa division manager sa Taheiyo Cement ug sa pamilya niini diha sa Mansueto Subdivision, barangay Bulacao, dakbayan sa Talisay.

Ang hepe sa Talisay City Police Station nga si Supt. Henry Biñas nga nahinabi sa Banat News kagahapon nagkanayon nga duna na silay mga tawo nga gisundan sa pagpamanhig sa magtiayong Ernesto Silverio, division manager sa nahisgutang kompaniya ug Ceferina Mar Porras apan nagdumili pa kini sa pagbutyag og dugang pang detalye kabahin niini.

Hinuon matud ni Biñas nga padayon pa nilang gipaladman ang imbestigasyon sa maong hitabo.

Gibutyag usab niini nga giimbitar nila niadtong Lunes ang kanhi empleyado sa magtiayon nga si Joseph “Tata” Historya kinsa gipapahawa sa magtiayon gikan sa trabaho niadtong buwan sa Hulyo niining tuiga tungod kay dunay nabuhat nga kalapasan.

Ang magtiayong Porras nagnegosyo isip dealer og mga softdrinks diha sa N. Bacalso, dakbayan sa Sugbo ug si Historya empleyado nila sulod na sa unom na ka tuig.

Matud pa ni Biñas nga si Historya mipasaka og kaso ngadto sa Department of Labor and Employment batok sa iyang kanhi amo tungod sa pagpapahawa kaniya nga wala siya hatagi og pabawon.

Ang kaso pending pa gihapon sa maong ahensya apan wala na magtunga-tunga si Historya sa hearing niini matud pang Biñas.

Sukad nga nawagtang sa trabaho sa Historya si Ceferina Mar nakadawat na og mga mensahe sa text ug usa niini nagkanayon nga “mobayad namo Tata, mapriso gyud mo ana mam”.

Kahinumduman nga niadtong Sabado sa gabii gikan sa ilang tindahan sa N. Bacalso samtang nagbiyahe diha sa Mansueto Subdivision paingon sa ilang balay sa Friendly Homes Subdivision, Bulacao dihang kalit silang gibanhigan sa duha ka wala mailhing lalaking nagsakay og motorsiklong puwa nga nag-atang daan.

Si Ceferina Mar diha kini maglingkod sa front seat tapad ni Ernesto Silverio samtang ang ilang anak nga si Joyce Ethel, 14, ug katabang nga sila si Catherine Hellecenia ug Diary Dumada-ug diha sa likod nga lingkuranan maglingkod.

Si Ernesto Silverio nakaangkon og mga samad pinusilan sa lawas ug wala na kini makaabot nga buhi ngadto sa Chong Hua Hospital samtang si Ceferina nakaangkon og samad pinusilan sa tuong bahin sa dughan.

Ang menor ug duha ka katabang nakalingkawas sa maong pagpamanhig tungod kay wala sila mangaigo sa bala. Nakuha sa mga polis ang 10 ka kabhang sa mga bala sa .9mm diha sa crime scene. (BANATNEWS)