Gwen ug Mike mitingon

CEBU, Philippines - Pakigkitaan ni Kalihim Jesse Robredo sa Department of Interior and Local Government (DILG) karong sunod buwan ang duha ka mga dagkong haliging lider sa lalawigan ug sa dakbayan sa Sugbo aron masulbad ang problema sa mga apektado sa 93-1.

Si Robredo nakigtagbo kagahapon sa buntag sa mga apektadong pamilya sa 93-1 isip pagtuman sa gitahas kaniya ni Presidente Benigno Aquino III nga husayon ang maong suliran.

Gumikan niini miingon si Robredo nga gusto niyang maaninaw pag-ayo ang   tinuoray nga kahimtang sa maong isyu pinaagi sa pagpaminaw sa pulso sa apektadong mga molupyo.

Midugang siya nga kun masuta niya ang maong isyu, itakda niya ang pagbalik nganhi sa Sugbo aron makigtabo kang Gobernador Gwen Garcia ug Mayor Michael Rama.

Sa iyang pagpamulong atubangan sa mga   mitambong sa forum nga gipahigayon sa Cebu Technical School kagahapon sa buntag nga gitambongan sa nagkalainlaing lider sa urban poor organization nga apektado sa 93-1,gipasabot ni Robredo nga gusto niyang masulbad ang maong problema nga walay malupigan.

Busa karong nasayran na niya ang suliran sa mga nanimuyo sa luna nga iya sa kagamhanan sa lalawigan, gusto niyang masulbad kini nga saksihan ug uyonan nila ni Gobernador Garcia ug ni Mayor Rama.

Ang suliran sa 93-1 nahimong komon nga isyu nga nasinati ni Robredo sa iyang pagka-mayor sa dakbayan sa Naga.

Iyang gisaysay nga sa iyang pakigbisog nga kapanalipdan ang katungod sa mga eskuwater nga namuyo sa dili nila kaugalingong yuta sulod sa siyudad, iyang gipuga ang tanan niyang paningkamot aron masulbad ang problema sa hapsay nga paagi.

Matud pa niya nga malampuson kaayo ang iyang mga paagi didto sa Naga pinaagi sa pagpakigtagbo niya ngadto sa mga tag-iya sa yuta ug sa mga apektadong mga molupyo hangtod nga nakab-ot nila ang gitawag nga win win solution.

Ingon usab niini ang iyang gustong mahitabo sa mga urban poor nga nanimuyo sa yuta nga iya sa lalawigan nga masulbad sa hapsay nga paagi.

Gituohan usab niya nga pinaagi niini magkauli sa maayong kabubut-on ang mga opisyal sa kagamhanan sa dakbayan sa Sugbo ug sa kagamhanan nga nagkahiubsanay gumikan lang ning isyu sa 93-1. (BANAT NEWS)