7 ka senior nga sugarol tiklo

CEBU, Philippines - Pito ka mga Senior Citizen (SC) mikagulkol sa prisohan human hidakpi sa kapolisan sa dakbayan sa Mandue nga namusta og masiao sa miaging gabii.

Si SPO2 Danilo Ibarreta sa kapolisan sa Presinto 5 sa Opao Police Station miila sa duha sa mga nadakpan nga sila si Hermina Inot, 65, ug Jesen Selosa, 68 , ug lain pang lima ka SC kansang ngalan nakalimtan sa kapolisan.

Matud pa ni SPO2 Ibarreta nga ang mga dinakpan gibalhog dayon sa ilang detention cell ug pasakaan kini og kaso nga may labot sa   paglapas sa Republic Act 9287 o illegal nga sugal.

Dugang pa ni Ibarreta nga daghan pa ang ilang nadakpan sa miaging semana ug pulos na nila napasakaan og kaso sa piskaliya .

Si Ibarreta miingon nga base sa gilatid sa balaod sa giamendar nga Republic Act 1602 kon illegal nga sugal sa matag kalapasan nga mahimo bilanggoon ang malapason gawas lamang kun mobayad og multa nga balor og P10,000.

Kutob sa madakpan gumikan sa illegal nga sugal nga masiao sa Kabisay-an ug Mindanao ug jueteng   sa Luzon P24 mil ang gikinahanglang piyansa niini sa pagkakaron, matud ni Ibarreta. - Romeo T. Limpangog (BANAT NEWS)