Uhong kahilungan napalgan

CEBU, Philippines - Usa ka talagsaong uhong ang napalgan sa mga residente sa barangay Sirao ning dakbayan niadtong milabay’ng adlaw nga nakapahingangha sa mga tawo.

Sa report sa Buena Mano sa GMA News kagahapon, usa ka Alex Rabasano nga molupyo sa maong dapit maoy nakakita niini nga susama sa gidak-on ang ‘payong-payong’ sa planggana.

Sumala pa sa report, nanguha unta og ipangsud-an nga dabong si Rabasano diha sa kawayanan dihang sa tanto niyang pagpangita nakit-an niya ang maong uhong.

Tungod sa katalagsaon sa kadako niini dali niya kining gikuha ug gidala sa ilahang balay aron ipakita sa mga nasuhito niini.

Nagtuo silang makaon kini apan gumikan sa tambag sa ilang katiguwangan tungod sa katalagsaon sa gidak-on niini ilaha lang una kining gipadaplin samtang wala pay makahatag kanila og kasigurohang dili kini makahilo.

Usa ka Robert Bontuyan nga usa ka agriculturist ug residente sa maong dapit sa susamang report miangkong mao pa usab kini ang labing unang higayon nga siya nakakita og ingon niini kadako nga uhong.

Ang maong uhong may gilapdon nga 15 pulgadas (ang payong-payong) ug 16 ka pulgadas ang gitas-on ug may gibug-atong duha ka kilo ug 300 gramos.

Ang uhong o fungi dili pareho sa tanom, kini mabuhi lang sa mga nadunot nga tanom ug mananap.

Sumala pa sa website nga pinoyideas.com ang mga uhong nga gitawag sa siyensya og ‘fungi’ usa na karon sa popular nga pagkaon bisan asang suok sa kalibutan gumikan sa kalami niini, grano ug ang makuhang bitamina.

Kini walay tambok ug ubos kaayo ang katam-is ug kaparat maong gihimo na kining alternatibong ‘subak’ isip karne. Adunay makuhang protina susama sa naa sa karne, iron, calcium, phosphorus ug vitamin C. Aduna sad kini selenium, potassium, Vitamin B complex ug copper.

Apan dili tanang uhong o fungi ang makaon tungod kay adunay pipila ka klase niini ang makamatay ilabi na ang Amanita phalloides samtang ang uban adunay dili maayong epekto sa panglawas sa tawo kun makakaon. - Edwin Ian Melecio (BANAT NEWS)