6 ka Salisi gang sikop

CEBU, Philippines - Unom ka mga gipasanginlang sakop sa Salisi gang ang nasikop human sa kooperasyon sa 12-anyos nga batang ilahang miyembro nga unang nadakpan human mangawat sa usa ka kustomer diha sa usa ka kan-anan   niadtong Sabado sa gabii diha sulod sa Grand Convention sa barangay Lahug.

Ang nangadakpan giilang sila si Arlene Cortez, 38, taga Bohol; Sheila Mae Madaya Coton,19, taga Tagbilaran, Bohol; Elaine Buenaventura, 24; Jomar Aloria, 25 ug Jonathan Elejio Piao, pulos mga taga Davao.

Ang lima ka hamtong nga suspek diha madakpi sa sulod sa ilang giabangang pension house sa Cabancalan sa dakbayan sa Mandaue human gitultulan sa 12-anyos nilang kauban.

Base sa imbestigasyon, usa ka Stella Marie Silma Intalan, 42, residente sa Sangi, Minglanilla ang gikawatan sa mga suspek atol nga kini nanihapon uban sa mga paryente diha sa maong establisamento.

Apan usa sa mga higala ni Intalan nakamatikod ug gikuptan ang 12-anyos nga bata samtang dali usab nga nangikyas ang mga kauban niini.

Human motug-an ang bata sa ilang giabangang pension house gilusad dayon ang hot pursuit operation nga miresulta sa pagkasikop sa lima ka hamtong ug pagka-rekober sa 25 ka nagkalain-laing bag, 35 ka pitaka, 14 ka cellphone, upat ka relo de pulso, siyam ka 20 US Dollar traveller checque, usa ka US Dollar Traveller Cheque, usa ka US Dollar, nagkalain-laing sunglasses, usa ka laptop bag, mga IDs ug libro - Edwin Ian Melecio (BANAT NEWS)