Gullas miawhag karsada sa Guba pang-ayuhon

CEBU, Philippines - Usa ka tagdumala og dakong unibersidad sa dakbayan sa Sugbo nga residente sa barangay Guba, dakbayan sa Sugbo miawhag sa mga opisyal sa dakbayan sa pagsusi ug pagtagad sa suliran sa mga karsada paingon sa maong bukirang barangay.

Si Dr. Jose “Dodong” Gullas, executive vice president sa University of the Visayas (UV), nagkanayon nga nindot nga puy-an ang barangay Guba tungod sa kaanindot sa alimyon sa kabuntagon, taghoy sa mga langgam, ug ang kahilom sa lugar nga tugawon lamang sa mga paghot sa iro ug kasaba sa mga habal-habal.

Apan matud niya nga luyo sa kaanindot mao ang kakuyaw sa lugar tungod sa lubaklubak nga karsada ug lawom nga mga bung-aw nga wala mamentinar. Mao kini ang masinati sa mga motorista nga moagi sa Pit-os paingon sa Guba ug Ayala Heights, Sirao paingon sa Guba.

Atol sa ulan-ulan, sumala pa ni Gullas, ang karsada mabulit sa lapok ug adunay dangog nga bahin ug kuyaw sa landslide.

“I’ve witnessed big boulders rolling down to the roadsides. It is no wonder I often hear comments that passing through these roads are likened to passing through Afghanistan territory,” sumala pa ni Gullas. “I do not know whom to address the problem we are facing in the area. Is it to the mayor, my good friend Michael Rama or to Congresswoman Cutie del Mar?” Nagtuo si Gullas nga sa mga suliran sa lubaklubak ug kuyaw’ng agian nga karsada, mahimo kining isumbong ngadto sa congressman, ngadto sa gobernador dayon ngadto sa mayor. “However, I am ignorant about the situation in our place in Guba. Any rightful citizen living in the area would ask the basic question: Hay man among gamay kwarta aron ma-improve among lugar, among pagpuyo?”

Sumala pa ni Gullas nga nanghinaot siya nga dili bungolbungolan lang sa mga opisyal ang iyang panawagan.

Maayong dili maghulat ang mga opisyal nga adunay trahedya nga mahitabo ug ilang aksiyonan kini sa dali nga panahon. - John Rey Saavedra (BANAT NEWS)