CEBU, Philippines - Hapit maputol ang ulo ug naputos og samad tinigbasan ang lawas sa usa ka 23-anyos nga lalaki. Ang nagpatay kaniya mao ang silingan nga iyang gikaaway ug gilupig og sinukmagay sa sitio Dunggo-an, barangay Cawayan, lungsod sa Dalaguete kagahapon sa ala una sa kaadlawon.
Ang biktima mao si Eleno Quilaton Cartilla alyas Elly, 23, molupyo sa nahisgutang lugar. Samtang ang suspek mao si Mark Joseph Carin Carza alyas Makmak, 23, ulitawo.
Matud ni PO2 Maximo Belciña, imbestigador sa Dalaguete Police Station sa dihang nahinabi sa Banat News nga si Carza boluntaryong mitahan sa iyang kaugalingon sa mga polis nga miabot sa crime scene.
Si SPO2 Cleto Pia nga maoy nangulo sa mirespondeng mga polis nakadiskobre sa biktima nga nagbuy-od na nga naputos og samad tinigbasan ang kalawasan ug hapit na maputol ang ulo niini nga nakaangkon og tinigbasan sa liog.
Samtang na-recover sa kapolisan ang sundang nga maoy gituohang gigamit sa krimen 15 ngadto sa 20 metros ang gilay-on gikan sa nahimutangan sa patay’ng lawas sa biktima.
Dugang nahipos nga impormasyon sa kapolisan nga ang biktima ug ang suspek nag-inom nianang pagkasayong gabii ug dihang nangahubog na ug nagsinukmagay miresulta sa krimen. - Darrel A. Carumba (BANAT NEWS)