Mananagat milugos sa anak

CEBU, Philippines - Gipadakop sa kabanay ang usa ka mananagat nga gipasanginlang miunay og lugos sa iyang 15-anyos nga kamanghurang anak babaye. Ang mananagat suspek usab sa pagpanglugos sa tulo pa ka laing mga anak babaye niining nangaminyo na didto sa usa sa mga barangay sa lungsod sa Sta. Fe, isla sa Bantayan niadtong Domingo sa alas 6 sa hapon.

Ang 54-anyos nga mananagat nga residente sa naasoy’ng lugar nagtingkagol karon sa kapolisan sa maong lugar.

Gibiktima niini ang kamanghuran niyang anak babaye nga nag-edad og 15-anyos.

Matud ni PO3 Sheila Ilustrisimo sa Women’s Desk sa Sta. Fe Police Station sa dihang nahinabi sa Banat News nga ang mananagat gidapit alang sa interrogation human gireklamo mismo sa iyang 15-anyos nga anak babaye nga maoy miunay og lugos kaniya.

Matud ni PO3 Ilustrisimo nga ang mga iyaan sa 15-anyos maoy nangusog ug miabag niini human milarga ang asawa niini sa Manila niadtong Sityembre aron pagduaw sa mga anak niini nga nangaminyo na ug atua na manimuyo sa Manila.

Si PO3 Ilustrisimo miingon nga nadungog na sa mga silingan ang estorya nga gilugos sa mananagat ang iyang anak hinungdan nga gipalayo kini ug didto na gipapuyo sa mga iyaan niini.

Sumala pa ni PO3 Ilustrisimo nga sa pagkakaron, gipaabot pa nila ang resulta sa gihimong eksaminasiyon ni municipal health officer Rowena Manalili ug ang rekomendasyun sa DSWD pagkustodiya sa biktima alang sa himuong pagpasaka’g kaso batok sa suspetsado.

Dugang nahipos nga impormasyon ning tigbalita gikan sa mga silingan sa biktima nga misumbong sa Bantay Radyo nga ang mananagat adunay gibanabanang 10 ka anak ug giingong tulo kanila ang gilugos. Giingong gihilom lamang kini ug sa dihang nangaminyo ang mga anak niining gipanghilabtan, didto na gipapuyo sa Manila paglikay sa mga tabi-tabi. - Darrel Carumba (BANAT NEWS)