Estudyante sa CTU giluba og grass cutter

CEBU, Philippines - Usa ka estudayante sa Cebu Technological University (CTU) sa Daanbantayan Campus nalandig sa tambalanan human kini dunggaba og grass cutter sa iyang silingan didto sa sitio Pangpang, barangay Tapilon, lungsod sa Daanbantayan sa miaging Biyernes sa buntag.

Ang biktima nailhan nga si Wanawen Cabusa Ducante, 21, usa ka estudyante sa CTU sa Danbantayan Campus, samtang ang suspetsado nailhan nga si Rey Delos Santos alyas Waway, 27, nga silingan sa biktima.

Base sa inisyal nga imbestigasyon sa kapolisan nasayran nga ang biktima didto sa balay sa iyang iyaan nga si Celsa Cabusa nga naglimpyo sa grass cutter.

Unya sa kalit, mipatim-aw ang suspetsado ug sa wala’y igong hinungdan gi-ilog niini ang grass cutter sa biktima ug gihansak ngadto sa   lawas sa biktima.

Ang biktima kinsa wala gyud makakat-on og self defense, nakaangkon og mga samad dinunggaban sa nagkalainlaing bahin sa iyang lawas.

Samtang ang suspetsado dali ra usab nga nasikop nila ni barangay councilor Mark Anthony Luche ug mga tanod ug daling gihatod ngadto sa buhatan sa kapolisan sa maong lungsod ug didto ibalhug sa prisohan.

Gisubay pa sa kapolisan ang hinungdan sa maong pagpanunggab.

Samtang ang laing biktima sa dunggab sa mao gihapong adlaw mao si Joel Bacalso Hermoso, 42, nga taga Almendras street, dakbayan sa Danao, kinsa samdan sa tiyan ug tuong kamot.

Base sa inisyal nga imbestigasyon sa kapolisan sa syudad sa Danao nasayran nga si Hermoso ug mga kauban nagkalingaw og inom sa ilang lugar sa diha nga usa sa ilang silingan nga si Jinmemar Ebalarosa Lawas, 30, miagi sa tungod ni Hermoso.

Unya gikomedyahan ni Hermoso si Lawas, apan malagmit wala sa kondisyon ang naulahi napikon kini ug nasuko.

Daling milanit si Lawas og barbecue stick diha sa giinoman ni Hermoso ug mga kauban ug dayong hansak niini ngadto sa tiyan ug tuong kamot sa biktima.

Apan matud pa sa kapolisan nga samtang naglinayogay si Hermoso ug Lawas, kalit lang mipaka ang ulo sa naulahi hinungdan nga misaliring kini sa yuta.

Walay miangkon sa kainom ni Hermoso nga mipuspos og gahing butang ngadto kang Lawas nga maoy hinungdan sa pagpaka sa lawas ug ulo niini. - Lesley Caminade (BANAT NEWS)