Suspetsadong rapist nasikop

CEBU, Philippines - Usa ka 23 anyos nga lalaki gibalhog sa bilanggoan human kini pasanginli nga milugos sa usa ka 15 anyos nga dalagita didto sa dumpsite sa sitio Soong, barangay Mactan, dakbayan sa Lapulapu sa miaging gabii.

Ang mikagulkol sa prisohan mao si Jay Lamoste, 23, ulitawo nga taga sitio Saac 1, sa barangay Buaya, sa maong dakbayan.

Si Lamoste maoy gitumbok sa biktimang dalagita nga milugos kaniya.

Ang team nga naglangkob nila ni PO2 Miguel Lumas ug PO2 Reynold Balangawan sa Criminal and Investigation Division sa Lapulapu City Police Office maoy misikop sa suspetsado.

Sa pasiunang pakisusi nila ni PO2 Lumas, nasayran nga gidala sa maong suspetsado ngadto sa dump site sa barangay Mactan ang biktima ug didto gipahimuslan ang pagkababaye niini.

Miangkon ang biktima nga bisan og giunsa niya sa pagpaningkamot nga dili hinglugosan, gilupig gayud ang iyang kusog sa suspetsado hinungdan nga nakuha gyud siya.

Human sa maong paglugos ang biktima naghilak nga mipauli sa ilang balay ug human kini mosumbong sa iyang ginikanan, miadto dayon sila sa buhatan sa kapolisan ug gireklamo ang hitabo.

Kasong pagpanglugos ang ipasaka batok sa suspetsado. - Romeo T. Limpangog (BANAT NEWS)