CEBU, Philippines - Malipayon kaayo ang mga Senior Citizen (SC) nga nanambong sa seminar bahin sa pagpamuhi og ligwan nga gipahigayon didto sa San Roque Parish, sa barangay Subangdaku, dakbayan sa Mandaue kagahapon.
Matud pa ni Rene Arreglo, presidente sa Ligwan Philippines Inc. (LIGWAN) nga gihimo nila ang tanan aron ika-tunol sa ilang kompaniya ang libreng pangalagad ngadto sa mga retirado ug sa mga kabanay niini kinsa gustong muogmad sa industriya sa pamuhi og ligwan.
Ang paghatag og libreng seminar sa Ligwan sa mga SC maoy ilang pakig-alayon sa programa nga Senior Citizens Hour sa DYMR, Radyo ng Bayan Cebu nga iya sa kagamhanan.
Nunot usab sa kasaulogan sa Senior Citizens Week, niining semanaha gihalad sa DYMR ug sa Ligwan ang maong serbisyo sa pag-edukar sa mga SC ug sa ilang mga kabanay sa hustong paagi sa pagbuhi og ligwan.
Hinuon matud pa ni Arreglo nga sa seminar kagahapon daghang mga batan-ong representante sa mga SC nga maoy mitambong sa nahisgutang seminar.
Karong adlawa , isuroy na sila sa mga dapit nga may mga colony sa ligwan aron masud-ong sa tanan ang aktuwal nga paagi sa pagbuhi sa ligwan.
Ang maong industriya nagsugod na sa paglambo dinhi sa nasud pinaagi sa paningkamot sa mga nagpadagan sa kompaniya sa Ligwan. (BANATNEWS)