Magsoong Ouano magsambunot
CEBU, Philippines - Gipaabot nga magsambunot ang managsoong Ouano ug Cabahug sa umaabot nga election sa barangay Opao ug Looc sa dakbayan sa Mandaue karong Oktubre 25.
Ang mga ngalang mitumaw nga magpapili sa pagka-barangay kapitan naglakip kanila ni Rafael “Paeng” Ouano ug Barceliza “Liza” Ouano Ecalina , kinsa pulos mga anak ni kanhi Mayor Alfredo Ouano.
Sila pulos usab igsoon ni Board Member Thadeo Ouano ug Opao Barangay Kapitan ug ABC Federation President Jovita Tuela Joy Ouano.
Si Paeng maoy gisuportahan ni Kapitan Ouano nga mopuli sa iyang katungdanan ug gisuportahan usab ni Board Member Ouano ang kandidatura ni Liza nga igsoon niini.
Sa laing bahin magkaatbang nga kandidato sa pagka- kapitan sa barangay Looc sila si kanhi Konsehal Raul Pokang Cabahug ug ang igsoon niini nga si incumbent Barangay Kapitan Sol Cabahug.
Si Kapitan Cabahug nga magpasubli sa katungdanan sa ikaduhang termino maoy usa sa mga dumadapig ni Mayor Jonas Cortes sa miaging piniliay.
Samtang si Pokang supporter usab ni kanhi Kongresista Nerissa Soon-Ruiz sa miaging piniliay kinsa nakaangkon sa iyang kaparotan batok sa kasamtangang mayor sa dakbayan. (BANATNEWS)
- Latest
- Trending
