AFP mihimakak sa pasangil sa Bayan

CEBU, Philippines - Kusganong gihimakak sa Armed Forces of the Philippines Central Command ang alegasyon sa partilistang Bayan Muna ug human rights group nga Karapatan nga sila maoy utok sa pagpatay sa usa ka lider sa mga mag-uuma sa Guihulngan sa Negros Oriental niadtong milabay’ng Biyernes sa kaadlawon.

Ang alegasyon may kalambigitan sa pagpusil patay kang Rene Quirante kinsa gibanhigan sa wala mailhing lalaki ug gipasangil nga mga sakop sa 11th Infantry Battalion maoy mga responsable niini.

Si Lt. Col. Jerry Lim, ang Group Commander, 3rd Civil Relations Group, CRSAFP nga nagbase sa Centcom nagkanayon nga andam ang kasundaluhan pag-atubang sa imbestigasyon aron lamang masuta ang kamatuoran.

 Gihulagway ni Lim nga usa lamang ka matang sa “free publicity stunt” ang gihimo sa maong mga pundok aron lang makakuha og simpatiya ug suporta gikan sa publiko.

Hinuon wala na makurat ang AFP sa maong mga alegasyon sanglit kaniadto paman kanunay nang sa ilaha ipahid sa mga militanteng pundok ang pasangil matag adunay kaalyado nilang mapatay.

Si Quirante alyas Toto sumala pa sa pamahayag sa Central Command maoy lider sa kapunongan sa mga mag-uuma nga Kaugmaon-KMP sa Guihulngan ug maoy chapter chairman sa Bayan Muna sa maong lugar.

 “Centcom strongly adheres to the laws of the Constitution and as such respects for human rights are upheld at all times in the exercise of our duty,” matud pa ni Lim sa gipadalang pamahayag dinhi sa Banat News.

Dugang pa niya nga base sa impormasyong ilang nakuha mahitungod kang Quirante, kini sakop sa Yunit Militia (YM) sa NPA sa maong lugar.

Dugang impormasyon nga napasakaan kini og kasong multiple murder sa Guihulngan RTC tungod sa pagpatay sa tulo ka sundalong sakop sa 11th IB niadtong Mayo 23, 2009 sa sitio Busay, sa barangay Hilaitan, Guihulngan. Ang maong kaso anaa pa sa preliminary investigation.   (BANATNEWS)