Pundo sa urban poor di hilabtan

CEBU, Philippines - Sa pagwagtang sa kabalaka sa sektor sa urban poor nga magamit ang trust fund alang sa socialize housing alang sa palitong yuta sa barangay Poblacion, si Konsehal Dennis Basillote, sa konseho sa dakbayan sa Talisay mipasalig nga ang siyudad adunay kaugalingong pundo alang sa maong katuyoan ug dili kini manghilabot sa kuwarta sa urban poor.

Si Basillote   kinsa maoy chairman sa committee on urban poor and rural development mipasabot nga may resolusyon na siyang gisang-at sa konseho kalabot niini, ang resolution numero 2010-10-01 nga naaprobahan sa konseho niadtong Martes.

Ang nahisgutang resolusyon naghatag og pagtugot kang Mayor Socrates Fernandez sa pagpalit sa 1,160 metro kuwadrado nga luna nga gipanag-iya ni Loven Abadia nga bayran pinaagi sa pundo sa panudlanan sa siyudad karon.

Ang maong luna gigamit na karon sa siyudad isip extension sa sam-ang publiko diha sa Poblacion tungod kay ang maong sam-ang puno na kaayo.

Si Konsehal Val Ylanan ug Konsehal Romeo Villarante mikwestiyon kang Basillote kabahin sa budget nga gamiton sa pagpalit sa luna kay sa   P437.6 milyones nga budget sa siyudad karong tuiga, ang siyudad migahin og P14 milyones apan giingong nagamit na sa siyudad ang maong pundo sa pagpamalit og mga luna sa wala pa ang eleksyon niadtong Mayo 10, 2010.   (BANATNEWS)