CEBU, Philippines - Usa ka mamalitay og kaka ang gipusil sa iyaha untang palitan niini tungod sa iyang pagpamugos nga makahangyo sa presyo diha sa Poblacion Ward I, lungsod sa Minglanilla.
Ang biktima naila nga si Genero Aying Cabarubias, 40, molupyo sa Basak Pardo, sitio Laguna dakbayan sa Sugbo. Samtang padayon pang gipangita sa kapolisan ang namaligya sa kaka nga namusil.
Sa imbestigasyon sa kapolisan, ang maong biktima miadto sa maong lugar aron unta mopalit og kaka.
Apan gumikan sa kamahal sa presyo ang biktima mihangyo sa gikatahapan apan wala sila magkasinabot ug nisangpot sa panaglalis ug diha-diha mibunot og wala matinong armas ang gikatahapan dayong pusil sa biktima.
Si Cabarubias nakaangkon og samad pinusilan sa walang kilid ug daling gidala sa Minglanilla District Hospital apan gibalhin sa Vicente Sotto Memorial Hospital. (BANATNEWS)