Bag-ong merkado sa Mandaue depektoso

CEBU, Philippines - Nahibaw-an ang daghang depekto sa gitukod nga bag-ong merkado sa sitio Tribunal sa barangay Centro sa dakbayan sa Mandaue nga maoy hinungdang nagpanagana ang mga manindahay sa pagbalhin ngadto.

Ang depekto sa bag-ong merkado   mao ang kataas sa gihabogon sa matag lamesa nga kinahanglang mokinto ang mga mamalit.

Gawas niini anaa pay nagbabag nga mga tubo ug mga wiring nga kuyaw kaayo nga makuryentihan sila.

Unya gumikan sa kalayo na, malagmit wala nay mga customer nga moadto didto busa langawon ang manindahay sa maong merkado unya mag-atubang sa dakong risgo ang ilang kinabuhi tungod kay molabang pa sila sa highway diin magbaguros kanunay ang mga sakyanan nga moagi.Si Jimmy Vasquez nga maoy consultant on market ni Mayor Jonas Cortes mibutyag sa mga tigbalita nga pabalhinon gyud nila sa labing dali nga panahon ang mga vendor sa karaang merkado ngadto sa bag-ong merkado bahala na og unsay mahitabo.

Si Cesar Mercadal nga maoy market administrator miingon nga magtukod ang kagamhanan og linain nga latayan alang sa mga mamalit sa bag-ong merkado aron dili mamiligro ang ilang kinabuhi sa mga sakyanan sa maong dapit. (BANATNEWS)