Chicharon ordinance ipabasura

CEBU, Philippines - Nagkadaghan karon ang mga negosyante og chicharon ilabina sa dakbayan sa Carcar ang nanawagan sa Kapitolyo nga ipabasura ang chicharon ordinance nga gipalabang ni bokal Arliegh Sitoy sa sixto distrito.

Suma pa ni Capitol Consultant on Information Rory Jon Sepulveda nga daghan nang mga chicharon maker ang nanawag sa buhatan ni Gov. Gwen Garcia nga isalikway ang ordinansahon nga nagmando sa pagbutang og label sa produkto nga motug-an sa mga konsumedor nga makadaut sa lawas ang chicharon.

Kini human miangkon si Sitoy nga personal ang iyang katuyoan sa pagpalabang sa maong ordinansahon taliwala sa pag-ingon sa naasoy nga provincial board member nga usa na lamang ka kaon niya og chicharon mahanaw na siya niining planetaha.

Si Sepulveda nagkanayon nga sigun sa iyang nahibaw-an, nga walay bisan usa ka legislation nga pagahimuon sa usa ka local legislator kun ang katuyoan niini alang lamang sa iyang kaugalingon ug dili sa kabulahanan sa katawhang Sugboanon.

Sigun pa ni Sepulveda nga usa sa basehanan sa pagsupak sa gobernadora sa maong ordinansahon mao nga makaapektar kini sa pipila ka mga negosyante ug labaw sa tanan ang nagpahiping personal nga katuyoan sa nagpanday sa maong ordinansahon.

Gawas sa laraw sa gobernadora nga vetohan niya ang ordinansahon kun mapasar man kini sa hunta probinsiyal, ang tigpamaba sa Kapitolyo wala hinuon motumbok nga ang gobernadora mohangyo sa ubang mga provincial board nga dili suportahan ang nahisgotang ordinansahon. (BANATNEWS)