Tanod gipatay sa tanod

CEBU, Philippines - Patay nang napalgan ang usa ka tanod nga gidudahang giunay og pusil sa iyang kaubang tanod samtang nag-duty sa canteen sa Mantayupan Falls sa barangay Campangga, lungsod sa Barili niadtong Miyerkules sa alas 4 sa kaadlawon.

Ang biktima mao si Maximo Ricablanca, 34, minyo, molupyo sa nahisgutang lugar. Samtang ang suspek mao ra usab ang iyang kaubang tanod nga si Agapito Pantalean.

Matud ni PO2 Jurve Timagos sa Barili Police Station sa dihang nahinabi sa Banat News nga ang biktima nga nakig-inom pa uban sa suspek og beer ug pagkahuman sa ilang inom nananghid kining mopauli gikan sa duty.

Nangatarungan ang suspek sa dihang gisukitsukit sa kapolisan nga nianang pagka-kaadlawon mibalik siya sa lugar aron pagdala unta og matimo sa biktima apan didto iyang nakit-an nga patay na kining nag-ubo ug sa dihang iyang giduol nasuta nga nagkadugo kini nga dunay samad pinusilan sa tiyan hinungdan nga nangayo dayon og panabang.

Atol sa pagresponde sa kapolisan ug sa gihimo niining imbestigasyon, migawas ang mga pagduda nga ang kaubang tanod maoy responsable sa krimen hinungdan nga gidakop kini ug gibalhog sa karsel ug kagahapong adlawa gipaubos sa paraffin test pagtino kun mao ba gyud kini ang responsable sa krimen sanglit sila ra man duha ang kauban niini sa dihang wala pa mahitabo ang pagpatay.

Ang suspek padayong mihimakak sa krimen ug gipaabot pa sa kapolisan ang resulta sa paraffin test alang sa pormal nga pagpasaka og kaso batok sa suspek. – BANAT NEWS