Gradwado sa UV top 9 sa RME exam

CEBU, Philippines - Usa ka gradwado sa University of the Visayas College of Engineering and Architecture nasulod sa top 10 sa labing ulahing Registered Master Electrician (RME) Licensure Examinations nga gihatag sa Professional Regulations Commission.

Si Engr. Dendei Castro Camaongay, migawas nga 9th placer sa kuha nga 82.5 porsiyento sa naasoy’ng pasulit. Si Camaongay nagkanayon nga nga ang iyang score motaas pa unta kun aduna pa siya’y kaisog pag-usab sa tubag sa pangutana nga namatngonang sayop diay.

“I realized that I shaded the wrong answer in one of the questions. I wanted to change it but I was scared that the machine would not recognize my new answer so I just let it be,” matud pa ni Camaongay.

Si Camaongay, 30, kinsa lumad nga taga Compostela, Cebu, usa na ka lisensiyadong Electronics and Communications Engineer. Matud niya mikuha lamang siya sa pasulit sa RME aron pagdungag sa iyang credentials aron makakuha og trabaho.

Gipresentar si Camaongay sa mga opisyal sa College of Engineering and Architecture pinanguluhan ni Engr. Venancio Besavilla, ngadto kang UV Executive Vice President Dr. Jose “Dodong” Gullas, uban sa mga tinun-an sa engineering nga nakadala og dakong garbo sa unibersidad.

Ang UV mapasigarbohong mipaila sa unom ka mga PRC registered Mechanical Engineer kinsa nakapasar sa pasulit sa miaging bulan. Ang bag-ong mga mechanical engineer mao sila si Renante E. Bato, Jerry T. Calvo Jr., Jonel C. Leorna, Nolasco C. Morales Jr., Johnrald C. Celada ug Jessie G. Bagares.   – BANAT NEWS