Credit Card, ATM hackers sikop

CEBU, Philippines - Unom ka mga giingong miyembro sa sindikatong Bautista Group mogamit og mga peke nga credit cards ug ATM cards ang nadakpan sa Cebu City Police Office kagahapon.

Ang unom giilang sila si Gelatio Bautista Nataño, giingong lider sa Bautista Group nga naglihok sa tibuok nasud, James Alcantara, Anthony Villarama, Bernardo Cruz, Rudolfo Gaya, Maria Roxanne Venezuela Torlao ug Anthony Jarlo nadakpan sa grupo ni Supt. Pablo Labra sulod sa usa ka hotel sa dalan Escario ning dakbayan.

Si Sr. Supt. Melvin Ramon Buenafe, direktor sa CCPO sa pakighinabi sa Banat News mibutyag nga namatikdan ang modus operandi sa grupo sa usa sa mga dagkong establisamento dinhi sa dakbayan human sila makit-i nga may mga deperensya sa gigamit nga credit cards sa mga suspek. Nakuha gikan sa grupo ang 20 ka mga pekeng credit ug ATM cards lakip na ang mga genuine cards, usa ka bultong may sulod nga gituohang shabu, nagkalain-laing identification cards, skimming machine ug uban pang gituohang gamit sa ilang operasyon.

Si Buenafe nagkanayon nga ang skimming machine maoy gamiton sa grupo aron pagkopya sa data kon impormasyon sa mga credit ug ATM cards sa mga biktima ug kun makuha na kini gamit ang computer makopya na nila ang maong mga cards.

Matud pang Buenafe ‘highly organized’ ang grupo ug naglihok sa mga highly urbanized areas sama sa Sugbu nga diin ang paggamit og credit cards ug ATM cards dili na bag-o sa mga tawo.

Usa sa mga pamaagi niini matud pang Buenafe mao nga adunay kakunsabo diha sa usa ka establisamento ang grupo ug pagbayad sa biktima gamit ang iyang card human ma-swipe, i-swipe usab nila kini sa skimming machine, niining paagiha makuha nila ang impormasyon sa credit cards ug makahimo na og kopya niini.

Matud pang Buenafe kinahanglang tan-awon og maayo sa mga mogamit og credit cards kun asa dad-a sa modawat niini ang ilang card human nila gitunol.

Samtang ang personal identification number (PIN) makopya nila pinaagi sa video camera. Mao gihapon kini ang ilang pamaagi sa pagkopya sa ATM cards, matud pang Buenafe magbutang ang grupo og skimming device diha sa baba sa sudlanan sa ATM machine. Ug ang PIN makopya sama sa pagpakaaron-ingnong nag-text diha sa luyo sa biktima apan ang tinuoray nag-video na kini sa kamot sa biktima ug kun i-slow motion makita kun asa ang tudlo niini mituplok.

Sumala pang Buenafe ang mga biktima maoy magbago og bayad sa utang sa credit cards ug ang tag-iya sa ATM cards makawatan sa iyang kwarta diha sa bangko. – BANAT NEWS