Noval miklarong speech ni Red sa Kamara sayop

CEBU, Philippines - Ang OIC mayor sa Compostela nga direktor sa Department of Interior and Local Government (DILG-7) Pedro Noval misulat kang Interior Sec. Jesse Robredo aron ipasabot nga sayop ug dili tinuod ang privilege speech ni Kongresista Red Durano nga nabangkarota na ang lungsod ug misamot pa ang krimen tungod sa kapakyas sa Comelec pagresolbar sa election protest nga nakapugong pagpalingkod sa mananaog pagka-mayor nga si Joel Quiño, bise mayor ug mga sakop sa konseho.

Subay sa sulat nga gipadala ni Noval ngadto kang Robredo niadtong Sityembre 28, gihulagway niini nga maayo ang temporaryo karon niyang pagpadagan sa lungsod nga nakatigum og P7,093,973.95.

Napanglantawan ni Noval nga mosaka pa ngadto sa P10 milyones kun makolekta na ang ubang mga bayranan sa buhis ug ang share sa Internal Revenue Allotment (IRA).

Gisukip ni Noval sa iyang suwat ngadto ni Sec. Robrero ang certification sa manager sa Landbank of the Philippine nga si Ramon Destajo ingon man ang manager sa Philippine Postal Savings Bank niadtong Septiyembre 27 kabahin sa savings sa lungsod.

Si Noval miingon nga ang statistics sa kapolisan, mikunhod og 30.79 porsiyento ang crime rate gikan sa Hulyo hangtod sa Septiyembre nga ubos kaayo kun itandi sa 52.62 porsiyento itandi sa milabay’ng tuig sa susamang kwarter.

Gisukip usab ni Noval ang certification sa VECO nga nagpamatuod nga nabayran na nila ang dakong utang sa kuryente sa lungsod.

Kahinumdoman, mibahad si Durano atol sa privilege speech niini nga lisudlisoron ang pangayuong gahin sa DILG ug Comelec alang sa 2011 kun padayong dili maresolbar ang election protest nga gisang-at ni kanhi Mayor Ritchie Wagas batok sa kampo ni Quiño.

Si Noval miingon nga pabor siyang maresolbar sa labing daling panahon ang kontrobersya aron makabalik na siya sa DILG-7.  - BANAT NEWS