Rama: Bar exam sa Vis-Min anhi sa Cebu

CEBU, Philippines - Usa si Mayor Michael Rama sa mga sektor nga nangusog nga anhi sa Sugbo himuon ang sunod nga bar exam alang sa mga examinee sa Kabisay-an ug Mindanao aron dili na mahasol pagpuyo sa kaulohan.

Si Rama nagkanayon nga aron dili na mausab ang nahitabong kagubot sa Taft Avenue, duol sa De La Salle University diin gihimo ang 2010 Bar Exam nga mibilin og 47 ka tawo nga naangol tungod sa mibuto nga granada.

Nahitabo kagahapon ang panagtigom tali sa mayor ug sa dean sa College of Law sa University of San Jose-Recoletos nga si Atty. Jonathan Capanas ug ilang gidepensahan ang ilang tinun-an nga si Jed Carlos Lazaga nga gipasanginlang maoy utok sa nahitabong insidente.

Nagkanayon si Capanas nga ilang protektahan si Lazaga ug midangop gyud siya sa kapolisan aron mabutangan og igong seguridad ang maong tinun-an nga tua karon sa kaulohan.

Dugang pa niya nga walay klarong basehan ang kapolisan sa Manila sa pasangil nga gihimo nila kang Lazaga ug nabalaka siya og maayo sa pagduot kang Lazaga sa maong insidente.    

Matud pa ni Capanas nga dili makiangayon nga usa ka Cebuano ang gitumbok nilang suspek sa hitabo.

Gihulagway ni Capanas si Lazaga nga usa ka maayong estudyante ug maayo usab og rekord sa tunghaan busa dili siya motuo sa mga pasangil batok niini. Ang USJ-R mohatag og legal assistance kang Lazaga ug bukas usab kini sa pagpasaka og kaso sa mga responsable sa pagkasikop niini sa higayon nga masuta nga wala gyu’y kalabotan si Lazaga sa insidente.   – BANAT NEWS