Yllanan kadawat bugalbugal gikan kang Basillote

CEBU, Philippines - Si Konsehal Dennis Basillote sa dakbayan sa Talisay mipakita og pagbugal-bugal kang Konsehal Val Yllanan ug gitawag usab niya ang naulahi og traydor atol sa gipahigayong sesyon niadtong Martes sa buntag.

Si Basillote kinsa nagkupot sa kopya sa suwat ni Yllanan ngadto kang Jessee Robredo, secretary sa Department of Interior and Local Government (DILG) miawhag ngadto sa ilang mga kauban sa konseho nga moduso og resolusyon sa pagpasidungog kang Yllanan tungod sa pagsuporta niini kang Presidente Ninoy Aquino sa milabay’ng eleksiyon.

Ang nahisgutang suwat ni Yllanan ngadto kang Robredo nga dunay petsa nga Agosto 16, 2010 ang konsehal naghangyo sa nahisgutang kalihim nga tabangan siya nga makapahimulos sa iyang prebihiliyo isip napiling ikatulong konsehal sa dakbayan sa Talisay.

Gibutyag usab ni Yllanan sa mao niyang suwat nga wala siya hatagi og komitiba ug gani walay pasilidad ang iyang opisina karon.

Matud ni Yllanan nga sa wala pa ang pagpangampaniya giagni siya sa Alayon Party nga makig-alyado sa maong grupo apan sa kataposan giluwa ra usab siya sa maong partido tungod sa iyang pagka-vocal sa pagpangampaniya pabor kang P.Noy. Kahinumduman nga si Senador Manny Villar maoy gipaluyohan nga kandidato sa pagka-presidente niadtong milabay nga national election.

Gibutyag usab ni Yllanan nga ang mao niyang sitwasyon karon iyaha nang gipaabot ngadto kang Mayor Socrates Fernandez apan ang mao niyang reklamo wala hatagi sa pagtagad.

Si Basillote sa iyang bahin, nagkanayon nga si Yllanan matawag nga traydor tungod kay ubos kini sa landong sa administrasyon ug didto hinuon midapig sa kaatbang sa ilang partido.

Matud usab niini angayang pasidunggan si Yllanan sa iyang gibuhat tungod kay nangangkon kining mipadaog kang Aquino diha sa Talisay.

Si Yllanan sa iyang bahin nagkanayon nga gitinuod lang niya ang mga pasangil sa iyang mga kauban kaniadto bisan unta og wala niya kini buhata.

Kahinumduman nga niining bag-o lang pormal na nga mibalhin si Yllanan ngadto sa Liberal Party.  – BANAT NEWS